Выстаўка "Полаччына - край творчасці"

17.03.2018 10:00
29.04.2018 17:00

Са старажытных часоў людзі імкнуліся да прыгажосці. Нашы продкі выраблялі побытавыя рэчы не толькі зручнымі і практычнымі, але і аздаблялі іх роспісам ці інкрустацыяй, упрыгожвалі інтэр’ер саламянымі павукамі, вязанымі карункамі, вышыванкамі ды іншымі сродкамі.

Сучасная Полаччына таксама багатая на таленавітых майстроў, якія ствараюць сапраўдныя творы мастацтва з самага простага матэрыялу: дрэва, саломкі, паперы, гліны…

Музей традыцыйнага ручнога ткацтва Паазер'я запрашае на выстаўку “Полаччына – край творчасці”

У экспазіцыі выставы прадстаўлены работы сяброў клуба народных майстроў і мастакоў “Майстар” пры Полацкім раённым Цэнтры рамёстваў і нацыянальных культур. Яны жывуць у розных кутках Полаччыны і ахопліваюць у сваёй творчасці амаль усе накірункі традыцыйнага дэкаратыўна-прыкладнога мастацтва.